100                TESTAMENTS ENREGISTRÉS AU PARLEMENT DE PARIS            (340)
Item, il donne et laisse à Katherine, sa suer, x livres Tournois pour une fois.
Item, à Marie, sa suer, x livres Tournois.
Item, il donne et laisse à Thibaut de Maiseray et à damoiselle Blanche sa femme, fille du dit testateur, tout ce que ilz li pevent devoir, et veult que leurs obligacions leur soient rendues et baillées franchement et quictement.
Item, il donne et laisse à la dicte eglise Saint Florent de Roye tous les aornemens qu'il a en sa chappelle de son hostel de Paris, c'est assa­voir, vestemens, nappes d'autel, calice, corporaux, paix, plaz, chande­liers, burettes d'argent, messel et bréviaire, à eulx estre baillez et delivrez après le trespassement de la dicte madame Perrenelle sa femme, à laquelle il prie que ou dit don elle, ne autre pour elle, ne mette aucun empeschement, et que ce present lais et don, en tant que à elle puet touchier et regarder, elle vueille consentir et avoir agreable. Et ou cas que elle ne le feroit ainsi, il ordonne que ceulx de la dicte eglise de Roye soient contens de en avoir la moitié, laquelle moitié ou dit cas leur sera baillée tantost après le trespassement du dit testateur.
Item, il donne et laisse à Guillemin le Glere, son nepveu, estudiant à Orleans, tous ses livres de droit canon, avec n° escus pour une fois, sauf toutesvoies son cours de loys et son signé qui seront trouvez en son estude; lesquelx cours de loys et signé le dit testateur donne et laisse à Aubelet le Clerc, frere du dit Guillemin.
Item, il donne et laisse au dit Aubelet sa maison, où demeure à present maistre Pierre de Marrigny, advocat en Parlement, laquelle fut Colin de Condé, parmi ce qu'il sera tenus de aler à l'escole et estu-dier; et ou cas que ainsi ne le fera, il le prive du dit lais et laisse ou dit cas la dicte maison au dit Guillemin.
Item, il donne et laisse encores au dit aubelet cent escus pour une foiz pour aprendre à l'escole, qui li seront distribuez par les mains du dit maistre Pierre de Marigny, selon ce que le dit maistre Pierre verra que le dit Aubelet en aura besoin.